2026 жылғы 20 қазанда М. Өтемісов атындағы Батыс Қазақстан университетінде «Цифрландыру және жасанды интеллект жағдайындағы білім беруді дамытудың қазіргі ғылыми және практикалық аспектілері» атты халықаралық ғылыми-практикалық конференция өтті. Іс-шара Қазақстан мен шет мемлекеттердің ғалымдарын, жоғары оқу орындары мен колледждердің оқытушыларын, докторанттарды, магистранттар мен студенттерді біріктірді. Конференция аясында білім беруді цифрлық трансформациялаудың, жасанды интеллектіні қолданудың және инновациялық педагогикалық технологияларды енгізудің өзекті мәселелеріне арналған 130-дан астам баяндама ұсынылды.
Конференцияны М.Өтемісов атындағы Батыс Қазақстан университеті, Белгород мемлекеттік ұлттық зерттеу университеті және Б.Б.Городовиков атындағы Қалмақ мемлекеттік университеті ұйымдастырды. Конференцияға Қазақстан, Ресей, Польша, Сербия, Өзбекстан және Әзербайжан елдерінің ғылыми және педагогикалық қауымдастықтарының өкілдері қатысты. Қатысушылардың географиялық ауқымының кеңдігі іс-шараның халықаралық сипатын және заманауи білім беру саласындағы өзекті міндеттерді шешуде кәсіби ынтымақтастықтың маңыздылығын айқындады.
Пленарлық отырысты М.Өтемісов атындағы Батыс Қазақстан университеті Басқарма төрағасы – ректорының міндетін атқарушы, қауымдастырылған профессор Г. С. Кайсагалиева ашты. Отырыс модераторы ретінде педагогика факультетінің деканы, педагогика ғылымдарының кандидаты Г. А. Ерғалиева сөз сөйледі.
Пленарлық отырысқа отандық және шетелдік жетекші ғалымдар қатысып, білім беруді цифрлық трансформациялау және жасанды интеллектіні қолдану саласындағы ғылыми зерттеулерінің нәтижелерін ұсынды. Пленарлық баяндама жасаған ғалымдардың қатарында Г.В. Макотрова – педагогика ғылымдарының докторы, Белгород мемлекеттік ұлттық зерттеу университетінің доценті (Ресей Федерациясы); К. А. Нургалиев – психология ғылымдарының кандидаты, доцент; Б. К. Васич – педагогика ғылымдарының кандидаты, Нови-Сад қаласындағы Экономика академиясы университетінің қолданбалы ғылымдар факультетінің доценті (Сербия); Л. В. Обыденкина – психология ғылымдарының кандидаты, «Назарбаев Зияткерлік мектептері» ДББҰ Педагогикалық шеберлік орталығының Батыс Қазақстан облысы бойынша филиалының директоры; Beata Skotnicka – педагогика мамандығы бойынша әлеуметтік ғылымдар саласындағы PhD докторы, Быдгощ қаласындағы Казимир Ұлы университетінің өкілі (Польша); А. Х. Казетова – педагогика ғылымдарының кандидаты, аға оқытушы; Е. С. Никитинский – педагогика ғылымдарының докторы, профессор және басқа да ғалымдар болды. Ұсынылған баяндамалар білім беруді цифрлық трансформациялау мәселелерін әртүрлі ғылыми және практикалық тұрғыдан қарастыруға мүмкіндік берді. Атап айтқанда, болашақ педагогтерді даярлау, оқыту тәсілдерін өзгерту, цифрлық инклюзияны қамтамасыз ету, студенттердің академиялық дербестігін дамыту және жасанды интеллектіні пәнаралық бағыттарда қолдану мәселелері талқыланды.
Конференция жұмысы үш секция бойынша жалғасты. Олар: цифрлық ортадағы оқытудың психологиялық-педагогикалық аспектілері; жасанды интеллектінің дамуы жағдайындағы халықаралық ынтымақтастық және педагог кадрларды даярлау; цифрлық инклюзия және геймификация мен иммерсивті технологиялар арқылы білім алушылардың икемді дағдыларын қалыптастыру. Секциялық отырыстар барысында қатысушылар жасанды интеллектіні мектепке дейінгі және бастауыш білім беруде қолдану, педагогтердің цифрлық құзыреттіліктерін дамыту, сыни ойлауды қалыптастыру, академиялық адалдық қағидаттарын сақтау және білім алушылардың психологиялық саулығын қолдау мәселелеріне арналған зерттеулерін таныстырды. Сонымен қатар оқыту сапасын арттыру және білім алу мүмкіндіктеріне қолжетімділікті кеңейту мақсатында геймификацияны, иммерсивті технологияларды және цифрлық білім беру ресурстарын пайдалану мүмкіндіктері талқыланды.
Конференция ғылыми диалог орнатуға, зерттеу нәтижелерімен алмасуға және инновациялық педагогикалық тәжірибені таратуға арналған маңызды алаңға айналды. Іс-шараның айрықша маңыздылығы – әртүрлі елдердің ғылыми қауымдастықтарын біріктіріп, жасанды интеллектінің технологиялық мүмкіндіктерін ғана емес, оны қолданудың педагогикалық, психологиялық және этикалық аспектілерін де талқылауға жағдай жасауында.
Қатысушылардың назарында білім берудегі адами әлеуетті сақтау, сыни ойлауды дамыту, педагогтердің цифрлық құзыреттілігін қалыптастыру және баршаға тең білім алу мүмкіндіктерін қамтамасыз ету мәселелері болды. Конференцияның өткізілуі халықаралық академиялық байланыстарды нығайтуға, кәсіби ынтымақтастықты кеңейтуге және қазіргі білім беру жүйесінің өзекті мәселелерін шешуге бағытталған практикалық ұсыныстар әзірлеуге ықпал етті. Іс-шара қорытындысы бойынша конференция материалдарының электрондық ғылыми жинағын шығару жоспарланып отыр.
М.Өтемісов атындағы Батыс Қазақстан университетінде өткен халықаралық ғылыми-практикалық конференция бірлескен ғылыми ізденістердің өзектілігін және білім беру сапасы мен қолжетімділігін арттыру мақсатында цифрлық технологиялар мен жасанды интеллектіні жауапкершілікпен енгізудің маңыздылығын тағы бір мәрте көрсетті.
