2026 жылғы 14 қаңтар күні Әлеуметтік ғылымдар білім беру бағдарламасының профессоры, тарих ғылымдарының докторы Агила Мустахимовна Нургалиеваның 75 жас мерейтойы мен ғылыми-педагогикалық қызметіне 50 жыл толуына орай «Тарих – өмірлік таңдау» атты дөңгелек үстел өтті.

Мерейтойлық дөңгелек үстелге факультеттің профессор-оқытушылар құрамы, шақырылған қонақтар, университет ардагерлері, түлектер, магистранттар мен студенттер қатысты. Іс-шара барысында өз саналы ғұмырын М.Өтемісов атындағы Батыс Қазақстан университетінде білім беру мен ғылым саласына арнаған, ұрпақ тәрбиесіне өлшеусіз үлес қосқан Агила Мустахимовнаның өмір жолы мен ғылыми-педагогикалық қызметі кеңінен баяндалды.

Мерейтой иесіне арналған құттықтау сөздер М.Өтемісов атындағы БҚУ-дың ғылыми жұмыстар және халықаралық байланыстар жөніндегі проректоры Ахмеденов Қажмұрат Мақсотович, университеттің кәсіподақ комитеті атынан төраға Қажиахметов Салауат Абайұлы тарапынан айтылды.

Сонымен қатар, Агила Мустахимовнаның шәкірттері мен әріптестері – Батыс Қазақстан инженерлік-технологиялық университетінің оқытушылары: тарих ғылымдарының докторы Тасмагамбетов Асет Сембаевич, тарих ғылымдарының кандидаттары Абдрахманова Раиса Лесовна, Ерназаров Жаскайрат Тлеккабылович, Осипов Николай Иванович, сондай-ақ заң ғылымдарының кандидаты, адвокат Мереке Ғабдуалиев құттықтау лебіздерін білдірді.

Іс-шара соңында сөз мерейтой иесі Агила Мустахимовна Нургалиеваға және оның жанұясына беріліп, барлық қатысушыларға көрсеткен құрметтері мен жылы лебіздері үшін алғыс айтылды.